投稿者： 古錐的
今仔日，是我的生日，嘛是阿母的艱苦日。自出世，身軀就攏有各樣，龍骨彎曲、胸坎雞胸、無法度行路，現此時猶閣揣無因端。十外冬矣，我的身體敢會恢復？
細粒子，予我佮別人看著無仝的媠；身體各樣，予我對性命的解說無仝。「無拚袂出名，搪著風湧毋免驚」，日子咧過，我定定問家己，敢捌因為碰壁煞來驚惶？敢會怨嘆哪會按呢生？我斟酌共想，每一个人的運命攏註好好，凡勢這是予我考驗，考驗我敢會放棄家己？不而過，我袂，因為我知影，性命偌爾珍貴，若無好好仔寶惜，毋才真正對不起家己。
為著予家己無遺憾，泅水、文學、朗讀，逐項都沐寡，甘願跤步踏差，嘛無愛連踏都踏無著。我毋敢講家己真出擢、有才情，不而過，堅心、向前行，是我記踮心肝頭的代誌。
自出世到今，我毋知影，當時會按怎，我干焦知影，我欲平安一世人。所擺人生會使行到遮，應當是足無簡單的代誌。凡勢這馬的你，當咧凝心，毋過我相信，天無絕人之路，你一定會成功。
