投稿者： 一蕊花
十月初三，伊無要意，甚至袂記得這層代誌，是伊的生日。
伊誠恬靜，對面腔看袂著伊的人生。少年拚性命，到今五十外外，毋捌聽伊一句怨嘆的聲。見擺煮食，看伊儉儉仔食，我看袂過，共踅踅唸兩句矣，伊煞感覺我傷過冗剩，講愛儉腸凹肚，共我教示一晡。
欲暗仔，我行佇阮兜的門口埕，看伊那來那臭老的影跡，不而過，彼圈腹肚仝款消敨袂離，毋是伊無愛減，是往過的工課無正常，毋才害伊帶病、代謝䆀。我共苦勸，囉伊儉罔儉，嘛愛開寡錢去看醫生，哪會知影，仙講都講袂伸捙，伊完全無欲聽。
人講：「無做袂親像，做了才知樣」，這句話我嘛佇伊的身軀頂學著，人若欲無去做看覓，干焦踮遐咧空喙哺舌，代誌永遠嘛袂解決，有影啦，毋過伊若會使共幫贊人的時間勼較短咧，加關心家己一寡，凡勢按呢會閣較好喔。
寫這篇，我用「伊」來稱呼，其實是我咧寫家己，毋是欲大趁錢，干焦向望會使平安順序過日子、健康食百二。
